31-Dekabr-sevinc payından
Bizim də süfrəyə tökülən gündür.
31 Dekabr-Arazboyundan
Sərhəd dirəkləri sökülən gündür.
Ağappaq qar yağdı al qanın üstə,
O qanı tökənlər susdular o gün.
Bizim tərflərdə yolkanın üstə
Tikanlı məftillər asdılar o gün.
Tarix qiymət verdi hər ilə, aya,
Həqiqət özünə yer edə bildi.
Məhəl qoymadılar şaxta babaya,
Ürəklər şaxtanı əridə bildi.
Sevinc yaşlarıyla baxdılar o gün,
Həsrətlə qovuşan əlin səsinə.
Bir qoca kabusu yıxdılar o gün,
Zaman təslim oldu elin səsinə.
Həmrəylik zülmətdə cevrildi oda,
Çökdü hər qayaya, çökdü hər daşa.
Dünyanı dolaşdı o səs, o səda,
Xalq xalqa qovuşdu, qardaş qardaşa.
31-Dekabr-sevinc payından
Bizim də süfrəyə tökülən gündür.
31 Dekabr-Arazboyundan
Sərhəd dirəkləri sökülən gündür.