Bu şəhərin başqa bənzəri yoxdu!
Bu şəhərdə başqa bənzərin yoxdu!
Keçib bu şəhərin küçələrindən
Yan alıram o sahilə.
Bu sahildən o sahilə
Qağayılar yenə uçur.
Səkilərdə sarı xəzəl,
Külək qovur,
Xəzəl qaçır.
Elə bil ki, sevgisindən
Bir yaralı gözəl qaçır.
Sahil sakit.
Nə gələn var,
Nə də gedən.
Nə soran var
Səni məndən.
İllər axıb bir su kimi.
İllər ötüb yuxu kimi.
İndi artıq bu şəhərdə
O dostlardan qalan yoxdu.
Əsmər yoxdu, Nərgiz yoxdu,
Bir də, bir də filan yoxdu,
O zəhərli ilan yoxdu!
Sahil sakit.
Qayalara hey çırpılan
Ləpələrin pıçıltısın anlayıram!
Ləpələrə getmə deyən
Qayaların hıçqırtısın anlayıram!
Bir vaxt məni duymadığın
O sahildə
Özgələrə gücüm çatmır,
Mən, özümü danlayıram!
Mən, özümü danlayıram!