Şemi-zade kibi saña
Eykel tikken şair bile
Toyalmadı lezetiñe,
Tatlı qırımtatar tili.
Kok batırı Amet-han da
Yır uydurıp yırlay edi.
Coşqun yırğa pek kelişken
Zengin qırımtatar tili.
Atsalar da, yıqsalar da,
Yıqılmadıñ halqıñ ile.
Yoq olmadıñ, qaviy turdıñ,
Cesür qırımtatar tili.
Tapsa da seni qıymay
Sürgünlikniñ afat yeli,
Halqnen birge kureştiñ sen,
Batır qırımtatar tili.
"Tatarlığım, tuvğan yerim"! –
Dep yırlağan neslim, ilim.
Oler – senden halq vazgeçmez,
Olmez qırımtatar tili.
Ey, Ana til, biz ogüñde
Tiz çökemiz bile-bile.
Oñğanıñnı korse edik,
Aziz qırımtatar tili.