Ağlayır divarı, daşı
Döşəmə, tavan ağlayır.
Quruyub gözünün yaşı,
Bu ev nə yavan ağlayır?!
Daha közərmir ocağı,
Qaynamır qazanı daha.
Qopub torpaqdan ayağı,
Bu ev sağ çıxmaz sabaha!
Ürəyi üzülüb gedir
Pəncərə- qapı ağlayır.
Ətəyi, çözülüb gedir
İynəsi, sapı ağlayır!
Niyə əyilib dirəyi,
Nə vaxt bitəcək, niyəsi?!
Yerə dəyəcək kürəyi,
Hanı, bu evin yiyəsi?!
Axtarın, tapın olası
Deyin ki, yurdun dağılır!
Deyin ki, zalım balası
Zülümlə qurdun, dağılır!