Mən bu ömrün sinəsinə dağ çəkdim,
Hərdən sıxıb lap suyunu çıxardım.
Yeri gəldi, turp da əkdim başında
Min hoqqanı, min oyunu çıxardım.
Ha istədi, yerə qoysun şələsin
Qamçıladım, döyə - döyə yaşadım.
“Topa tutdum”...beləsinin beləsin
Axşam, sabah söyə - söyə yaşadım.
Oda vurdum, közə vurdum - olmadı,
Ulduzumuz barışmadı - nə deyim?!
İnad etdim, üzə durdum - olmadı
Bircə dəfə umduğuna, hə deyim!
Aman Tanrım yazıq oldu bu ömür...
Bir son bahar yeli kimi yaşadım.
Bəlkə, kimsə yaşayardı başqa cür
Mən havalı, dəli kimi yaşadım!