Sən bir az fərqliydin.

Sən bir az fərqliydin, sən bir az fərqli 

Yerişin, duruşun, boyun fərqliydi.

Sən bir az fərqliydin, bir az eyy... bir az

Baxışın, gülüşün, huyun fərqliydi. 

Sən bir az fərqliydin, nə bilim, bəlkə 

Tək mənim anlayıb, duyduğum qədər?!

 Hamıdan, hər şeydən fərqli bir yerə -

 Fərqli bir köşəyə qoyduğum qədər!

 Sən bir az fərqliydin, bir az lap bir az 

 Demirəm təpədən – dırnağa, bütün...

 Nə danım bir az da mən “fərqli” oldum

 Fərqli olduğunu fərq etdiyim gün. 

 Sən bir az fərqliydin; bax, canım – gözüm,

 ... Görürsən, o bir az nə qan elədi ?!

 Səni “Sultan”, məni - bu səltənətə,

 Bu boyda taxt - taca “Xaqan” elədi!