Rənglərindən yoğrulub vətənimin köynəyi,
Yaşıl çölü, çəməni, göy səmanın örpəyi.
Qırmızı şəhid qanı, azadlığın mələyi,
Səni göyə ucaldan öpürəm tunc dayağı
Azərbaycan bayrağı!
Səmalardan Turanı süzür ulduzun, ayın,
Bütöv Azərbaycanın bu tayından, o tayın.
Borçalını, Şuşanı, Dərbəndi, Araz çayın
Bölük-bölük vətənim bitmir Tanrı sınağı,
Azərbaycan bayrağı!
Azadlığın yanğısı, inqilabdan doğuldun,
Candan keçən qaziyə, şəhidə kəfən oldun.
Vətəndən uzaqlarda bir parça vətən oldun
Kökü Azərbaycanda, dünyada qol budağı
Azərbaycan bayrağı!
Dalğalandı Şuşada, azaddır Qarabağın,
Cücərəcək bayrağım zirvəsində hər dağın.
Göyərəcək qayası sən sancılan torpağın.
Sevindirdi xalqımı, qələbənin sorağı
Azərbaycan bayrağı!
Ay boylanır solunda, günəş doğur sağında,
Kölgən nura bələnir göylərin qucağında.
Ruhuma bələnmisən, ruhum cənnət bağında,
İslama baş əyirik, yurdumuz türk ocağı,
Azərbaycan bayrağı!
Azərbaycan bayrağı!