Bir bəndənəm bu dünyaya gələli,
Ulu Tanrım, bu bəndənə həyan ol.
Səndən başqa yox kimsəyə ümidim,
Ulu Tanrım, bu bəndənə həyan ol.
Bu dünyanın gərdişinə dolandım,
Nə dedilər doğru bildim, inandım.
Bu həyatın yollarında talandım,
Ulu Tanrım, bu bəndənə həyan ol.
Fələk mənlə düz gəlmədi, kəs oldu,
Arzularım, ümidlərim heç oldu.
Taleyimə yazılanlar pozuldu,
Ulu Tanrım, bu bəndənə həyan ol.